Ddydd Sadwrn cyntaf yr Eisteddfod Genedlaethol ym Môn, daeth tîm y Glêr yn fuddugol yn rownd derfynol Talwrn y Beirdd BBC Radio Cymru. Ges i ac Osian, Iwan a Hywel ddim cyfle i ddathlu ar ôl y recordiad yn y Babell Lên – ond debyg y cawn ni ddigon o gyfleon yn nes ymlaen yr wythnos hon! Roedd hi'n ornest agos iawn rhyngon ni a'r Ffoaduriaid, ac roedd y rheini'n brin o ddau, gan fod Gruffudd a Gwennan wedi dod yn rhieni ddydd Mercher. Llongyfarchiadau mawr iddyn nhw, a chroeso i'r byd i Ddyfed Arthur. Llongyfarchiadau hefyd i Llion Jones o dîm Caernarfon am ennill Tlws Dic Jones am y gerdd gaeth orau yn y gyfres eleni, ac i'n Osian ni am ennill Tlws Coffa Cledwyn Roberts am y delyneg orau – clicia fan hyn i ddarllen y delyneg honno ar wefan Osian.

Gelli wrando'n ôl ar y ffeinal fan hyn unrhyw bryd cyn diwedd Awst.

Wele hunlun o'r llwyfan, a hwnnw mewn du a gwyn rhag iti gael dy ddallu gan ddrêps porffor newydd y Babell Lên! A bod yn deg, mae'r babell yn edrych yn llawer gwell ac yn fwy agos atat ar ei newydd wedd, a'r gynulleidfa i'w gweld yn llawer mwy cyfforddus ar y seti rhydd – da iawn wir.

Mae holl gynnyrch y gyfres ar gael i'w ddarllen ar lein ar wefan y Talwrn. Mae'r dolenni isod yn dy arwain at gynnyrch y Glêr ar hyd y daith, ac mae'r cerddi byrion yn rhoi blas bach o'r gwaith.

Trydargerdd 'Neges yn addo dialedd' gan Iwan Rhys o'r rownd gyntaf yn erbyn Ffostrasol:

RT @realDonaldTrump
Marciau isel gan Ceri Wyn!
Trist! Rhaid inni newid hyn!
Dagrau’r bluen eira wen!
Let’s Make The Talwrn Gerallt Again!

Trydargerdd 'Bwydlen' gan Osian Rhys Jones o'r ail rownd yn erbyn Criw'r Ship:

Ei ffelaffel a hoffaf, a'i hwmws
        A'i gwymon goruchaf,
    Ond drwy'r ŵyl yn daer holaf,
    A oes sglods a sgods a gaf?

Cwpled caeth gan Hywel Griffiths er cof am anifail fferm o'r rownd gogynderfynol yn erbyn Criw'r Llew Coch:

Mi wn mai galar yw'r 'mwww' –
Am riteiro mae'r tarw.

Triban beddargraff garddwr neu arddwraig gen i o'r rownd gynderfynol yn erbyn Tir Iarll:

Er hau dy hadau gleision
O dan dy rododendron,
Fe wledda'n ysgafala sgwod
O wlithod ar d'olwythion.