Yn ystod ei chyfnod yn Fardd Plant Cymru, fe gyhoeddodd Anni Llŷn a Beirdd Plant y gorffennol ddwy gyfrol wych o gerddi i blant gyda Gwasg Carreg Gwalch – Geiriau Bach Chwareus a Hwrê mae hi'n Wyliau! – ac mae'r traddodiad yn parhau yng ngofal y Bardd Plant newydd, sef Casia Wiliam. Enw'r gyfrol y tro hwn yw Clywch ni'n Rhuo Nawr!, cyfrol o gerddi am fwystfilod o bob math. Yng ngeiriau Casia yn ei chyflwyniad i'r gyfrol:

Tybed sut brofiad fyddai byw yr un pryd â deinosoriaid? Sut brofiad fyddai cael deinosor yn rhedeg ar dy ôl di?! Neu beth am ddarganfod ffosil deinosor? Dyma rai o'r syniadau dwi'n chwarae gyda nhw yn y casgliad yma o gerddi.

​Yn eu plith, mae dwy gen i, y naill am ddeinosor ag enw anhygoel iawn – Tyranodiplostegatopsgorithioraptor – a'r llall i dy atgoffa fod y bwystfilod mwyaf afiach yn y byd, hyd yn oed, weithiau angen cwtsh.

Yn dilyn llwyddiant Geiriau Bach Chwareus, mae Gwasg Carreg Gwalch wedi cyhoeddi cyfrol arall o gerddi i blant gan Fardd Plant Cymru, Anni Llŷn, a Beirdd Plant y gorffennol – tri ar ddeg ohonyn nhw i gyd, o Ifor ap Glyn i Gwyneth Glyn. Enw'r gyfrol y tro hwn yw Hwrê mae hi'n Wyliau! ac, fel y gelli di ei ddyfalu, mae'r cerddi i gyd yn sôn am wyliau! Fel mae Anni yn ei ddweud yn ei chyflwyniad i'r gyfrol:

Mae pawb yn hoffi gwyliau, hyd yn oed beirdd. Mae gwyliau yn golygu hwyl, rhyddid, antur a threulio amser gyda'r bobl orau yn dy fywyd. Ydi, mae hi'n fendigedig mynd ar wyliau. Felly beth am roi gwyliau bach i dy ddychymyg? Coelia di fi, rhwng dau glawr y cei di a dy ddychymyg wyliau anturus.

Ymhlith y cerddi y tro hwn mae dwy gen i, y naill am ŵyl newydd sbon a hynod anhygoel o'r enw Gŵyl Eurig, a'r llall am helyntion Gwenlli yn Enlli, Elin yn y Felinheli a Iona yn Llanddona … mwynha'r darllen!

Aeth pedair blynedd heibio ers i Ceri Wyn Jones gymryd yr awenau fel meuryn Talwrn y Beirdd BBC Radio Cymru, gan osod ei stamp ei hun ar y gyfres yn syth drwy wobrwyo tîm y Glêr yn bencampwyr yn 2012! Cynnyrch amrywiol y cyfnod hwnnw – yn limrigau a phenillion telyn a chywyddau a sonedau – yw cynnwys y gyfrol ddifyr hon, Pigion y Talwrn (Cyhoeddiadau Barddas).

Lansiwyd y gyfrol mewn talwrn arbennig (beth arall?) rhwng trefi Caerfyrddin ac Aberystwyth ym mis Tachwedd eleni, lle darllenodd Hywel Griffiths – aelod o dîm anhygoel y Glêr – yr englyn hwn ar gyfer y dasg gyntaf y noson honno, sef 'trydargerdd: hysbyseb bachog i'r gyfrol':

Cân ein cur, canon Ceri, a sŵn bît
        Sin y beirdd sydd ynddi,
    Cyfrol o glecs mor secsi,
    Rhydd a chaeth, mae'n rhodd i chi!

​Mae holl gynnyrch y talwrn ar gael i'w ddarllen ar lein fan hyn, ac mae'r recordiad ar gael tan 18 Rhagfyr.

Ar ôl cryn sibrwd a rhincian dannedd a darogan y byddai 2016 yn siŵr o gicio'r bwced cyn i'r Barddas diweddaraf godi ei ben dros y parapet – dyma gael drwy'r post rifyn y gaeaf o'r cylchgrawn hynod! A hwnnw'n rhifyn trwchus hefyd, yn llawn colofnau difyr ac ysgrifau ac adolygiadau, yn ogystal â llu o gerddi, wrth gwrs.

Mae talp helaeth o'r cylchgrawn yn tafoli cynnyrch barddol yr Eisteddfod Genedlaethol yn y Fenni eleni, lle enillwyd y Gadair gan fy nghyd-bodlediwr hoff, Aneirin Karadog. Dyw hi ddim yn gyfrinach mai fi oedd yn ail i Aneirin yn y gystadleuaeth honno, ac mae fy awdl i ar y testun 'Ffiniau' ar gael i'w darllen yn y Barddas cyfredol.

Cafodd yr awdl ei hysbrydoli gan daith lenyddol i ddinas Mwmbái yn 2014, lle bûm yn crwydro'r ddinas yng nghwmni cyfaill agos imi, ac un o feirdd Saesneg amlycaf India, Sampurna Chattarji. Cefais fy nharo gan y ffaith fod rhan o'r ddinas – Kala Ghoda – wedi ei henwi ar ôl cerflun du o geffyl a marchog a oedd yn arfer sefyll mewn man amlwg yno. Edward VII yw'r marchog hwnnw – Ymerawdwr India yn ei ddydd, ymhlith pethau eraill, ond Tywysog Cymru ydoedd pan grewyd y cerflun, a'r teitl 'Prince of Wales' sydd wrtho o hyd ym Mwmbái. Ond pan ddaeth India'n wlad annibynol yn 1947, symudwyd yr hen Edward truan a'i geffyl i sw leol, lle mae'n cadw cwmni heddiw i lu o adar egsotig …

​Cofia hefyd fod dau addasiad newydd i blant gen i yn y siopau gan wasg Atebol (sy â gwefan newydd sbon), ac mae'r rhifyn diweddaraf o gylchgrawn O'r Pedwar Gwynt allan hefyd (ac ynddo gywydd marwnad arbennig i Gwyn Thomas gan Peredur Lynch).

Fe fues i'n brysur dros yr haf yn cyfieithu ac yn addasu dwy gyfrol ddoniol iawn ar gyfer gwasg Atebol.

Mae'r gyntaf – Yr Arth a fu'n Bloeddio Bw! – yn fersiwn Cymraeg o lyfr poblogaidd gan David Walliams a Tony Ross, The Bear Who Went Boo! (HarperCollins). Dyma ddisgrifiad gwefan Gwales:

Stori lawn antur yn adrodd hanes arth wen ddrygionus sy'n byw ar ben y byd, mewn gwlad o eira a rhew. Hoff ddiddordeb yr arth ydy gweiddi 'BW!' gan ddychryn pawb o'i hamgylch. Un diwrnod caiff yr arth fraw, gan ddysgu nad yw hi'n beth da i weiddi a dychryn pawb bob amser!

Mae'r ail gyfrol – Cefin y Coala Carcus – yn fersiwn Cymraeg o'r llyfr diweddaraf gan Rachel Bright a Jim Field, The Koala who Could (Orchard Books). Hon yw'r ail gyfrol gan y ddau i mi ei haddasu'n ddiweddar – Y Llew tu Mewn oedd y gwerthwr gorau yng nghategori llyfrau Cymraeg i blant fis Chwefror eleni.

​Dyma ddisgrifiad gwefan Gwales o Cefin y Coala Carcus:

Dewch i gwrdd â Cefin y coala, sy'n hoffi pethau FEL Y MAEN NHW, heb DDIM NEWID. Ond pan mae pethau'n newid yn ddirybudd un dydd, daw Cefin i ddysgu sut i fwynhau profiadau NEWYDD ac ANHYGOEL. Stori ddoniol ar gyfer unrhyw un sy'n teimlo pryder wrth wynebu newid.

Mae stori'r arth fach wen ar gael nawr, a bydd stori Cefin ar gael i'w phrynu ar lein ac yn y siopau ym mis Rhagfyr. Dwy anrheg wych, felly, ar gyfer y Nadolig!

Mae'r testun Cymraeg wedi ei osod ochr yn ochr â'r testun Saesneg yn y ddwy gyfrol, ac felly'n arbennig o ddefnyddiol i blant a rhieni nad ydynt yn rhugl yn yr iaith.

I weld mwy o lyfrau gen i, clicia fan hyn.

Pan o'n i'n grwtyn ifanc, doedd dim llawer nad o'n i'n ei wybod am ddeinosoriaid – maint, enwau, pryd ro'n nhw'n byw, beth ro'n nhw'n ei fwyta …

Ro'n i wrth fy modd, felly, pan ofynnodd Gwasg Gomer imi addasu Aliens Love Dinopants, y diweddaraf mewn cyfres o lyfrau i blant o dan saith oed gan Claire Freedman a Ben Cort – Pobl y Pants a'r Deinosoriaid. Dyma ddisgrifiad gwefan Gomer:

Mae Pobl y Pants o'r Gofod wedi glanio reit yng nghanol y jwngwl, heb sylweddoli eu bod ar fin darganfod y pentwr mwyaf o bants erioed. Maen nhw ar ben eu digon … nes i berchnogion enfawr y pants anhygoel darfu arnyn nhw!

Dyma'r bedwaredd gyfrol i mi ei haddasu yn y gyfres wych hon, yn cynnwys Antur Fawr Panta Clos a Rhyfel Mawr y Pants. Clicia fan hyn i'w gweld nhw i gyd.

Nid dyma'r unig lyfr i blant imi ei addasu sy'n sôn am ddeinosoriaid direidus – cymer olwg hefyd ar Deg Deinosor Bach (Atebol). I wylio fideo ohonof i'n darllen y llyfr, clicia fan hyn.

Pobl y Pants a'r Deinosoriaid is my recently published adaptation (published by Gwasg Gomer) of Claire Freedman's and Ben Cort's latest addition to their brilliant Aliens Love … series. For more books, click here (including another one about dinosaurs).