A hithau'n dymor priodasau, daeth llyfr newydd amserol o'r wasg ddechrau Awst – Llyfr Bach Priodas (gol. Elinor Wyn Reynolds, Gwasg Gomer). Yn ôl gwefan y wasg, dyma gyfrol sy'n llawn

straeon difyr am gyfarfyddiadau, am syrthio mewn cariad ac am briodi. Cerddi bendigedig a ysgrifennwyd â chariad gan rai o feirdd gorau Cymru – cerddi i chi eu mwynhau a rhai y medrwch eu defnyddio fel rhan o’ch gwasanaeth priodas yn ogystal. Casgliad o luniau priodasau drwy’r degawdau sy’n cydgerdded â’r geiriau yn y gyfrol arbennig hon. Dyma anrheg ddelfrydol i bawb sydd ar fin priodi neu sy’n dathlu pen-blwydd eu priodas.

Yn wreiddiol, ysgrifennais y gerdd sydd gen i yn y casgliad ar gyfer priodas fy chwaer yng nghyfraith, Aranwen, a Dan ym mis Mai eleni. Addasiad yw'r gerdd o eiriau cân enwog Bob Dylan, 'Make You Feel my Love', a ganwyd o'r newydd lawer tro dros y blynyddoedd, yn fwyaf amlwg gan Adele yn 2008. Canwyd y geiriau Cymraeg yn hyfryd ar ddiwrnod y briodas gan Lisa Angharad, ffrind agos i Aranwen ers dyddiau ysgol, a hynny yn eglwys Cydweli, y dref lle cafodd Dan ei fagu. Roedd y fersiwn gwreiddiol o'r pennill olaf ond un yn cyfeirio at afon Gwendraeth Fach ac at y ffaith fod Dan yn blastrwr – y gorau yn Sir Gâr yn ôl rhai! – ond mae fersiwn gwahanol yn y gyfrol.

​Ac ystyried bod mwy a mwy o alw am farddoniaeth i'w darllen mewn priodasau, mae'r gyfrol fach hon yn llenwi bwlch go fawr yn y farchnad. Mae ynddi gerddi newydd gan dros ddeg o feirdd, yn cynnwys Hywel Griffiths, sy'n briod ag Alaw, trefnydd priodasau gyda'i chwmni, Priodasau Calon. Ac mae gan Llyfr Bach Priodas chwaer-gyfrol hefyd, sef Llyfr Nodiadau Priodas, ar gyfer trefniadau priodas neu negeseuon gan westeion.

Yn y gwanwyn 2016, fe ges i gomisiwn i lunio cyfres o ddeg o gerddi ar gyfer cyngerdd arbennig yn Eisteddfod Genedlaethol Sir Fynwy a'r Cyffiniau. Y delynores Catrin Finch oedd wrth y llyw, a'r pwnc oedd yr haul a'r planedau. Rhoddodd Catrin imi ryddid llwyr i ddehongli'r testun fel y gwelwn i orau, a dyna pam, efallai, imi dreulio llawer mwy o amser na'r disgwyl yn hel a didol syniadau cyn bwrw ati o ddifri!

Un allwedd at y gwaith oedd penderfynu ar y prif fesur, sef y soned. Mae'r soned yn fesur yr ydw i wedi ei osgoi yn y gorffennol, yn bennaf am fod cysgod dau o'r meistri, T.H. Parry-Williams ac R. Willams Parry, mor drwm arni. Ond fel y dôi anferthedd y testun yn raddol i'r golwg, daeth yn amlwg y byddai llinellau hirion y soned yn cynnig lle i wyntyllu rhai o'r syniadau dwysaf. A rhag i'r gyfres droi'n undonog yn hynny o beth, dyma droi at un arall o hoff fesurau T.H., sef y rhigwm, ar gyfer tair o'r planedau. Ar gyfer y darn rhagarweiniol, dewisais un o fy hoff fesurau i, sef mesur Burns.

Ar nos Fawrth Eisteddfod y Fenni, cynhaliwyd cyngerdd Serenestial yn y pafiliwn. Doedd gen i ddim syniad beth i'w ddisgwyl, a dweud y gwir, ond bu'n brofiad hudolus yn y pafiliwn newydd, ac yntau wedi ei leinio â chynfasau du, serog.

​Un o gampau Catrin oedd llwyddo i gyfuno cynifer o wahanol elfennau creadigol i greu un cyfanwaith swynol – cerddoriaeth Catrin ei hun, dawnswyr Ballet Cymru, llais y gantores Elin Manahan-Thomas, cerddoriaeth feiolin Charlie Lovell-Jones, a'r actores Sara Lloyd-Gregory yn darllen fy ngherddi. Yn ogystal â mwynhau'r cyngerdd cyfareddol yn fyw, roedd bod yn rhan o'r cynhyrchiad arloesol ac, yn fwy na dim, clywed Sara'n darllen fy ngeiriau, yn brofiad gwych iawn.

Mae'r cerddi ar gael i'w darllen ar fy ngwefan drwy glicio fan hyn.

O dro i dro bydd cais yn dod i gyfansoddi geiriau i gân. Mae'r gerdd ddiweddaraf sy ar y wefan hon yn gân a gyfansoddais i ryw flwyddyn yn ôl, ym mis Ebrill 2015, ar gyfer cyngerdd i ddathlu deng mlynedd ers sefydlu Côr Ger y Lli. Gofynnwyd i Robat Arwyn gyfansoddi cerddoriaeth i gyd-fynd â'r geiriau, a chomisiynwyd Lizzie Spikes, artist o Aberystwyth, i baentio darlun yn cynnwys geiriau'r gytgan (gelllir prynu'r darlun ar ffurf print ar wefan Lizzie). Clicia fan hyn i ddarllen y gerdd ac i wybod mwy am hanes ei chyfansoddi.

Mae'r rhifyn y gwanwyn 2016 o'r cylchgrawn barddoniaeth chwarterol, Poetry Wales, bellach ar gael. Yn ogystal â cherddi di-ri, mae'r cylchgrawn yn llawn dop o erthyglau ac adolygiadau yn ymwneud â barddoniaeth yng Nghymru a thu hwnt (clicia fan hyn i weld rhest gyflawn o'r cynnwys).

Ymhlith yr adolygiadau y tro hwn, ceir adolygiad gen i o gyfrol olaf Gerallt Lloyd Owen, Y Gân Olaf (Cyhoeddiadau Barddas, 2015). Dyma baragraff cyntaf yr adolygiad:

Mae'r rhifyn hwn hefyd yn cynnwys cerdd gen i, sef 'Haji Ali Dargah', cywydd a ysbrydolwyd yn sgil ymweliad â beddrod y sant Moslemaidd Haji Ali ym Mwmbái fel rhan o brosiect Walking Cities (a ariannwyd gan y Cyngor Prydeinig) yn 2014. Ysgrifennais y gerdd ar gyfer perfformiad cydweithredol â Zoë Skoulding fel rhan o brosiect Gelynion-Enemies Cymru yn 2015. Mae cerdd Zoë - a gyhoeddir yn y rhifyn hwn hefyd - yn barodi gwych o gywydd a ganodd Syr Dafydd Trefor i'r eglwys ym Mangor yn 1527 (bydd fy ngolygiad o gerdd Dafydd yn ymddangos ar wefan Cwlt y Seintiau maes o law).

Ceir yn y rhifyn hwn hefyd gyfres o gerddi gan SJ Fowler a ysgrifennwyd mewn ymateb i ffotograffau gan Kate Mercer (cyhoeddir y cerddi ochr yn ochr â'r lluniau), a hynny ar gyfer arddangosfa The Night-Time Economy yng nghanolfan gelfyddydol Glan yr Afon yng Nghasnewydd. Bydd yr arddangosfa (a gefnogir gan Gyngor Celfyddydau Cymru) ar agor drwy gydol mis Ebrill, a bydd hefyd yn ymweld â'r Rich Mix Gallery yn Llundain 17-31 Gorffennaf. Cefais fy nghomisiynu i gyfieithu i Gymraeg rai o'r cerddi, ac mae'r cyfieithiadau hynny ar gael i'w darllen yn yr arddangosfa.

The spring issue of the quarterly poetry magazine, Poetry Wales, is out now. As well as a shedload of poetry, the magazine features a host of articles and reviews on poetry in Wales and beyond (click here to see the full list of contents).

The reviews section for this issue includes my review of Gerallt Lloyd Owen's posthumous collection of poetry, Y Gân Olaf (Cyhoeddiadau Barddas, 2015). The first paragraph of the review can be read on this blogpost.

This issue also includes 'Haji Ali Dargah', a Welsh poem inspired by a visit to the tomb of the Muslim saint Haji Ali in Mumbai as part of the Walking Cities project (funded by the British Council) in 2014. I wrote the poem for a collaborative performance with Zoë Skoulding as part of the Gelynion-Enemies Cymru project in 2015. Zoë's poem - which also features in this issue - is a brilliant parody of a poem composed by Syr Dafydd Trefor for the cathedral church in Bangor in 1527 (my edition of Dafydd's poem will be available soon on the Cult of Saints website).

The issue also features a series of poems by SJ Fowler written in response to photographs by Kate Mercer (both poems and photos are shown in the magazine) for The Night-Time Economy exhibition at the Riverfront arts centre in Newport. The exhibition is supported by the Arts Council of Wales and runs until the end of April, and will also visit the Rich Mix Gallery in London 17-31 July. I was commissioned to translate some of the poems into Welsh, all of which are available to be read at the exhibition.