Arad Goch
ar ei newydd wedd

Mae yn y dre ddirgelion,
Mae yn y dre wahoddion,
Mae yn y dre un lle sy'n llawn
– Os awn – o hud a swynion.

Doi heddiw o hyd iddo
Lle gweli'r haul yn gwawrio,
A sglein cylltyrau arad cain
O haearn cywrain arno.

Mor rhwydd yw agor drysau
Heb guro, heb ddweud geiriau,
A hwylio i mewn i neuadd fawr
Bum llawr rhwng cyfyng furiau.

Der mas i wres y croeso,
Der mewn i'r dramâu heno,
Der nôl drachefn … ond siawns gen i
Na weli'r holl ddirgelion!

---

Ddiwedd Medi 2019, cynhaliwyd diwrnod agored yn adeilad Cwmni Theatr Arad Goch yn Aberystwyth er mwyn nodi agor yn swyddogol fynedfa newydd yr adeilad ar Stryd y Baddon. Lluniwyd y gyfres hon o dribannau ar gyfer yr achlysur hwnnw. Cyfeirir yn yr ail bennill at waith celf hardd a gomisiynwyd gan y gof Ann Catrin Evans i'w osod uwchben y drws ar flaen yr adeilad.

---

A poem to mark the opening of Cwmni Theatr Arad Goch's brand new front entrance on Bath Street in Aberystwyth.