|
Awn Ninnau yn Bananas
Ym maes y bêl mae’r mis bach – yn ei ôl A’r hen elyn bellach Yn y drws, a hyder iach Y curwn ei bac … hwyrach. Mae’r hen ods i Gymru’n waeth – fel erioed, Fel yr hen elyniaeth, Ond rhag mynd nôl i Gatraeth Herfeiddiwn y rhifyddiaeth Gyda’r hen awen heno – a galwn Y gelyn a’i herio … Gyda thân gadewith o, Gatland, England yn danglo! Ar galonau’r gelynion – codwn ofn! Cadwn ni’r ffin yfflon! A daw i godi â’i dôn Glyndŵr galonnau dewrion! Rhown ysbryd a rhown asbri – yr awen I’r chwaraewyr heddi Â’r gân fawr a ganaf i, Delwedd i’w hysbrydoli … Ond er angerdd y gerdd, gwn – nad yw hi Ond awen lawn tensiwn Rhag cau ffrwyn y cyffro hwn; Oes, mae eisiau emosiwn Yr anthem cyn y gêm, yn geg – i gyd, Ond mil gwell yw gosteg Y dyn nad yw’n gwylltio’n deg Â’i lais cŵl a’i seicoleg. Aiff Shane yn broffesiynol – at y gwaith, At y gêm flynyddol, Nid ar ei hyd ond ar ôl Mae Shane yn emosiynol. Mi gei di Mike gadw mas – a Stephen O’r stof ar y teras … Yma’n wyllt lle mae ’na ias Awn ninnau yn bananas! |
Rhwng 2010 a 2014 roedd y brif raglen foreol ar BBC Radio Cymru yn cael ei chyflwyno gan Caryl Parry Jones a Dafydd Du (Dafydd Meredydd bellach). Roeddwn i wrth fy modd yn gwrando wrth fwyta fy nghorn fflêcs, nid yn unig oherwydd yr hwyl roedd y ddau'n amlwg yn ei gael yn y stiwdio, ond am fod Rhaglen Dafydd a Caryl yn rhoi llwyfan yn achlysurol i farddoniaeth. Mae'n siŵr gen i fod eu bod, yn hynny o beth, wedi paratoi'r ffordd ar gyfer cyfres lwyddiannus Bardd y Mis ar Radio Cymru.
Dyma un o ddwy gerdd a luniais i'n arbennig ar gais Rhaglen Dafydd a Caryl (clicia fan hyn i weld y gerdd arall), sef cyfres o englynion i dîm rygbi Cymru'r ar ddechrau eu hymgyrch ym Mhencampwriaeth y Chwe Gwlad 2012. Gall fod yn amhosib weithiau i gefnogwyr y tîm cenedlaethol gadw'n cŵl pan fo'r gêm yn agos, ond dyna'n union yw'r hyn y mae'n rhaid i'r chwaraewyr ei wneud ar y cae. 
A series of englynion about the ability of Wales's international rugby team to keep cool when it matters, while their supporters go bananas in the stands! Originally written for Dafydd and Caryl's breakfast show on BBC Radio Cymru. Click here for more poems written for the national radio station.
|