Cywydd croeso
'Steddfod Gudd/Amgen 2021

Awst arall … a'r un stori,
Mis heb ŵyl a dim Maes B,
A'r glaw'n oer, a glynu'n od
Yn d'wddf mae sôn am 'Steddfod,
Rhyw gae aur yn Nhregaron
Heibio'r glwyd fel breuddwyd, bron.

Ond tybed? Mae'n Awst wedyn,
A'r cnau yn y perci'n wyn,
Ac os gwag o eisiau gŵyl
Yw'r haf, consuriwn brifwyl
Ar y we sy'n rhoi croeso
I'r hollfyd heb gost, dros dro.

Agorwn sgrin, yna sgrôl
Ar lein drwy ŵyl wahanol,
Gwnawn Faes o'r ardd, a chwarddwn,
Eistedd ar sedd a chreu sŵn
Heb orfod cau'r drysau'n drwm;
Gwisgaf het, gwasgaf fotwm!

Yn ein tai, gwnawn bartïon,
Ffrydio'r ffair adre ar ffôn;
Dyma 'Steddfod blaen bodyn
O bell sy'n gwahodd pob un
Â'i hashtag, ble bynnag bôn',
I dagio Ceredigion.

Ond nid rhithiol hollol yw'r
Ŵyl hud – na, real ydyw,
A'i rhyddid wedi'i wreiddio'n
Llwyfan y Ganolfan hon;
O Aber i bellter byd,
O unfan i'r cyfanfyd.

Ydi, mae'n Awst yma'n ôl,
A sŵn hwn sy'n wahanol
Ar lein ond, wir, eleni
Ddiwedd haf, ni welaf i
Lond Awst o brifwyl nad oedd:
Rhannaf ŵyl, a'i throi'n filoedd.

---

A'r Eisteddfod Genedlaethol wedi'i gohirio am yr ail flwyddyn yn olynol, daeth cyfle i gynnal 'Steddfod wahanol yn 2021. 'Steddfod Goll a gafwyd y llynedd, ac eleni – 'Steddfod Gudd! Penwythnos o gerddoriaeth wych ar lwyfan fawr awyr agored yng Nghanolfan y Celfyddydau yn Aberystwyth, a llond wythnos wedyn o arlwy amrywiol y 'Steddfod Amgen hefyd.

Roedd cael cais i lunio cywydd croeso i'r cyfan yn fraint ac yn her – y gair 'dewch' sy flaenaf fel arfer yn y math hwnnw o gerdd, ond doedd y ferf honno ddim cweit yn tycio eleni. Yn ei lle, dyma daro ar y gair 'rhannu' – rhannu ar y cyfryngau cymdeithasol yn ogystal â rhannu'r mwynhad yn un dorf fawr rithiol. Croeso i'r 'Steddfod blaen bodyn!

---

With the National Eisteddfod once again postponed until 2022, a different kind of Eisteddfod was held, nonetheless, in the first week of August 2021. This poem was commissioned to welcome people from all over Wales and beyond to enjoy a weekend of live music ond Aberystwyth Arts Centre's outdoor stage, as well as a week-long line-up of online cultural events.