Cyfarch Ceri
Ar bob pnawn Gwener, Ceri - o hyn mas, Lle bu maes Llanelli, Alawon afon Teifi Yn heulwen haf a glywn ni. Ti yw sgwrs holl gryts y sgwâr - dy gerdd di, Fe lif gan iaith lafar, Mewn llwch, ti'r un maen llachar, Ti yw'r wên, gapten Sir Gâr. Maharishi'r ymryson - ti, Ceri, Pan sefi yw'r safon, Ti yw gŵyl bît y galon, Ti yw lej di-atal hon. ... Ceri, rwyt ti'n un tonig - i hen steil Sidêt anghofiedig, Ti yw'r balans trybeilig, Ti yw'r wên a'r condom trig. Ti yw'r Welsh twat, rêl shit-head - sy'n y pyb Drwy sŵn pawb yn clywed Sillafau dros holl yfed Un sy'n dweud 'Welsh, isn' it dead?' I mi, arsehole amhersain - oet o hyd, Eiddot ti'r ddawn filain A'r gyts i roi 'mhob cytsain Y fersiwn braf a'r sŵn brain. |
Ym mis Awst 2014 fe ges i'r fraint o gael cyfarch y bardd buddugol yn seremoni'r Cadeirio yn Eisteddfod Genedlaethol Sir Gâr. Mae'r dasg o gyfarch fel arfer yn cael ei rhoi yng ngofal prifardd cadeiriog yr eisteddfod flaenorol, ond gan na chafwyd cadeirio yn Eisteddfod Genedlaethol Sir Ddinbych a'r Cyffiniau 2013, roedd y seremoni yn 2014 yn brin o fardd. Am ryw reswm, gofynwyd i mi lenwi'r bwlch - awgrym rhai o fy nghyd-feirdd hoff oedd bod yr Eisteddfod yn chwilio am rywun a fyddai'n saff o beidio ag ennill y Gadair!
Fel mae'r llun isod yn ei gyfleu, gobeithio, roedd bod ar lwyfan y brifwyl i weld Ceri Wyn Jones yn sefyll ar ganiad y corn gwlad yn brofiad arbennig iawn. Dyma'r tri englyn a luniais y prynhawn poeth hwnnw ar faes Llanelli, ynghyd â thri englyn arall (llai clasurol) a luniais i maes o law ar ôl darllen yr awdl fuddugol, a hynny ar gyfer noson i gyfarch Ceri yn Aberteifi ym mis Medi y flwyddyn honno (yn anffodus, doeddwn i ddim yn medru bod yno i gyfarch Ceri'n bersonol, a minnau ar fy ffordd i Gaeredin ar gyfer refferendwm annibyniaeth i'r Alban). Gellir darllen awdl fuddugol Ceri yng nghyfrol y Cyfansoddiadau a Beirniadaethau. A series of englynion composed for Ceri Wyn Jones, the winner of the Chair competition at the National Eisteddfod in Carmarthenshire, 2014. The first three englynion were read during the Chairing ceremony.
|