I Gyfarch Aneirin

A’r maes yn orwag rhagor,
Wedi rhoi yn ôl mewn drôr
Firi beirdd, a’r haf ar ben,
Ar ôl claearu heulwen
Yr ŵyl, ga’i fentro holi …
Y sêt, Nei, sut un yw hi?

Yw hi mor llyfn ag mae’r llun
Yn dishgwl? Ai hawdd disgyn
Fel hedyn i’w chofleidiau
I orffwys, fel i gwys gau?
I’w dwy fraich, ai difyr oedd
Suddo i wres hedd yr oesoedd?

Ai’r pren collen a benna,
Nei, i ble’r ei wedi’r ha’?
Yw’r un pren yn peri i
Dy ddwy goes bob dydd gosi
I gael eistedd ar glustog
Saer gwaith, mor hapus â’r gog?

I Sisial mae'n gaer dal, deg,
I Erwan, mynydd carreg;
A yw Laura’n cael hurio'r
Gadair hardd i'r ioga dro?
Yw’r cathod yn gwybod gwerth
Ei gwynfyd sgleiniog, anferth?

Yn y sedd pan eisteddi,
Oes pren o'r Hendre 'nddi hi?
A deimli di fochau Dic
Yn ei hestyll artistic?
Yn ei graen, a glywi o'r gro
Wynt ei becyn tybaco?

A'r sedd dlos … ond aros di,
Yn y fan ar gae'r Fenni
Ces eistedd, wedi meddwl,
Bnawn Mercher ar gader gŵl
Dy gamp am adeg, a'i hud
Un haf a deimlwn hefyd.

Pery heulwen y Fenni
Ym min hwyr yn dwym i ni;
Drwy'r hydref pery hefyd
Un haf braf, fe bery hud
Dydd Gwener a Mercher mwy
Yn nirfana Sir Fynwy.

---

Prifardd y Gadair yn Eisteddfod Genedlaethol Sir Fynwy a'r Cyffiniau 2016 oedd fy nghyd-bodlediwr hoff, Aneirin Karadog. Dyw hi ddim yn gyfrinach imi ddod yn ail i Nei yn y gystadleuaeth y flwyddyn honno, a hynny am gadair hardd iawn wedi ei chreu gan Emyr Garnon Jones a'i chyflwyno gan deulu'r diweddar Dic Jones er cof amdano, hanner canrif ar ôl iddo yntau ennill y Gadair yn 1966 am ei awdl enwog i'r 'Cynhaeaf'. Er mor anodd oedd ei lunio, dyma gywydd i longyfarch Aneirin ar ei gamp! Bu'n Eisteddfod lwyddiannus i'r ddau ohonon ni.

---

A poem to Aneirin Karadog, winner of the Chair competition at the National Eisteddfod in Abergavenny 2016. I came second to Aneirin in the competition – who better to win than my fellow-podcaster and good friend!