New Barn, Felindre

Ar ddaear Pant-y-bara
Nid oes na defaid na da.
Ar lawr llyfn y parlwr llaeth,
Seren wiw pensaernïaeth
A saif lle bu'r cryts ifanc
Yn storio bêls draw o'r banc.

Cegin a chlic i'w hagor,
Y dirgel dŷ drwy gil dôr.

Ymolchfa fach gwta, gudd
Tu mewn fel nant y mynydd.

Ac yna'r cychod gwenyn,
Bared wrth bared bob un,
Ryw chwe llath wrth ddwylath ddel,
Foch ym moch, dan fîm uchel,
Lle cwsg dan astell bellach
Deulu iau fel byrnau bach.

---

New Barn yw'r enw ar adeilad ar safle hen ffermdy Pant-y-bara ar gyrion Felidre, nid nepell o Landysul. Parlwr llaeth oedd yn sefyll yno'n wreiddiol, ond cartref i deulu ifanc ydyw erbyn hyn, ac un sy'n gwneud y defnydd pensaernïol gorau o'r ychydig le sy yno.

Gwefan ROA

Lluniais y gerdd gomisiwn hon, sef cywydd byr sy'n adleisio natur gryno a chymesur yr adeilad, fel Bardd Pensaernïaeth Eisteddfod Genedlaethol Sir Gâr 2014. Roedd gofyn imi ymweld â'r adeilad newydd (a ddyluniwyd gan Rural Office for Architecture) ar gyrion Felindre, nid nepell o Landysul, ac â phum adeilad newydd arall o bwys a oedd ar restr fer y Fedal Aur am Bensaernïaeth, ac ymateb yn greadigol i bob un yn ei dro. Clicia ar y dolenni isod i ddarllen y cerddi eraill.

● Stormy Castle, Bro Gŵyr (ceir fersiwn Saesneg hefyd)
● Old Farm Mews, Dinas Powys
● Ffwrnes, Llanelli
● Melin Talgarth (ceir fersiwn Saesneg hefyd)
● Capel Galilea, Llanilltud Fawr

---

A poem for New Barn near Felindre in Carmarthenshire, written as part of a commission for the National Eisteddfod in Carmarthenshire 2014. There are English versions of two other poems that formed part of the same commission, namely Talgarth Mill and Stormy Castle.