|
Parliament Square
Nats gwyn yn Parliament Square Ar y gwin fore Gwener Ddiwedd Ionawr, ac awren O antur rydd cyn dal trên Gen i i’w lladd, ac yn lle Dwyn yr eiliad yn rhywle Cynhesach, mwy cynhwysol, Yn sŵn y ffydd, es i’n ffôl Am dro heibio wynebe’r Nats gwyn yn Parliament Square. Haws gweld yn Parliament Square Annibyniaeth can baner Yr hen undeb, cofebion A thwf ymerodraeth hon, Na synhwyro’r sŵn arall, Sŵn dim yn y myllni mall, Sŵn diflas amherthnasedd, Sŵn y byw’n dawnsio’n eu bedd, Sŵn difa syniad ofer … Ond haws gweld Parliament Square. Es gam o Parliament Square, A wynebau dygn Aber Yn cymell o bell, a’r byd Fel llafar cyfaill hefyd, A’r parti’n y brifddinas A holl hwyl ei gŵyl fach gas, Ei hacer rad a’i fflags croes, Y noson honno eisoes Ar ben, un bore Gwener Yn oes gynt Parliament Square. |
Deffrais fore Gwener 31 Ionawr 2020 mewn gwesty ar gyrion maes awyr Heathrow, wedi cael noson hir o gwsg ar ôl taith hirach yn ôl adref o Kolkata. Bûm yno'n lansio cyfrol newydd o farddoniaeth i blant ar y cyd â Sampurna Chattarji, llyfr sy'n dyst i'r hyn sy'n bosib pan ddaw dau fardd ac, yn wir, ddau ddiwylliant ynghyd dros bellteroedd maith. Y dydd Gwener hwnnw, fodd bynnag, oedd diwrnod olaf y Deyrnas Unedig fel aelod cyflawn o'r Undeb Ewropeaidd, a'r noson honno fe dorrodd y wlad edau ei pherthynas â'i chymdogion agosaf. Roedd hi'n tynnu at chwech y bore pan godais, a minnau'n dal i ddilyn amser India, ac ni fyddai'r trên yn ôl i Aber yn gadael Euston tan ganol y prynhawn. I ble'r awn i ladd amser ar ddiwrnod fel hwnnw? Er gwell, er gwaeth, i Parliament Square â fi, a chael yno griw bychan llafar o Frecsitwyr ond, yn fwy na dim, ryw dawelwch aflonydd, dienaid. Ac nid rhyw gamargraff drwy lygaid collwr oedd hynny – na, roedd gwir orfoledd, y math o gynnwrf agored a ddisgwylid pe bai'r digwyddiad yn un gwir lawen, yn eisiau. Yn hytrach, doedd dim yn yr awyr ond yr hyn na allaf i ei ddisgrifio ond fel chwithdod, a'r awgrym lleiaf o gywilydd. Er mor llafurus y daith, ro'n i'n ddigon hapus i ddal y trên yn ôl i Aber, ac ymunais y prynhawn wedyn, ar brom heulog yn nannedd môr tymhestlog, â gwrthdystiad yn erbyn y penderfyniad i adael. Ac er pob siom, roedd hwnnw'n ddigwyddiad gwir gynhyrfus.
Gelli wrando arnaf i'n darllen y gerdd ar rifyn mis Chwefror 2020 o bodlediad Clera drwy glicio fan hyn (41.05 i mewn). 
A poem written after a chance visit to Parliament Square on the last day of January 2020, where instead of finding some great joy at being at last free from the shackles of the EU, I found nothing but its absence.
|