A'r gaeaf yn chwibanu yn nhwll y clo, daeth podlediad Clera mis Tachwedd i gynhesu'r tŷ! Neu'r car, o leiaf, oherwydd fe recordiwyd y rhifyn hwn – sy ar gael ar SoundCloud ac ar iTunes – yn fy nghar, mewn maes parcio stormus ar dir hen gastell yn Sir Gâr … Ta waeth, fe ges i a Nei gyfle i drafod yr hyn ry'n ni'n dau wedi bod yn ei wneud yn ddiweddar, o seremoni Llyfr y Flwyddyn i daith i India. Mae'r rhifyn hefyd yn cynnwys dwy sgwrs ddifyr iawn, y gyntaf â rhai o Gywion Cranogwen – prosiect barddonol newydd gan griw o ferched sy'n cyfuno celf, cerddoniaeth a cherddi – a'r ail â Brigitte Cloareg o Lydaw, ynghyd â'r holl eitemau arferol. At hynny, fe fanteision ni ar y ffaith fod Clera wedi derbyn nawdd yn ddiweddar – gan y cyfrifydd hael Llŷr James – i gomisiynu cerdd newydd sbon gan neb llai na'r prifardd Emyr Lewis.

1. Pwnco: ail englyn o fawl i Llŷr James, ein noddwr hael (01.10), eitem o seremoni Llyfr y Flwyddyn (03.50) a sgwrs am y lle sy'n cael ei roi i farddoniaeth ar y cyfryngau Cymraeg (09.55)
2. 20.50 Pos rhif 9 gan Gruffudd a'i Ymennydd Miniog
3. 24.15 Yr Orffwysfa: cerddi newydd sbon am Brexit gan y prifardd Emyr Lewis
4. 29.00 Sgwrs â rhai o Gywion Cranogwen am eu taith ddiweddar
5. 42.05 Sgwrs â'r Llydawes Brigitte Cloareg
6. 48.50 Llinell Gynganeddol Ddamweiniol y Mis!
7. 56.50 Y Newyddion Heddiw
8. 57.50 Llais Brigitte Cloareg yn canu englynion coffa Hedd Wyn gan R. Williams Parry

This month's Clera podcast – available on both SoundCloud and iTunes – was recorded in a sodden carpark somewhere in deepest, darkest Carmarthenshire … but the content is anything but soggy! Interviews with Cywion Cranogwen, a new all-girl poetry project, and Brigitte Cloareg from Brittany, as well as brand spanking new poetry by Emyr Lewis.

Un o uchafbwyntiau 2016 i mi oedd bod yn rhan o gynhyrchiad arloesol ac aml-gyfrwng Serenestial dan arweiniad Catrin Finch. Perfformiwyd y cyngerdd ym mhafiliwn yr Eisteddfod Genedlaethol yn y Fenni fis Awst. Lluniais gyfres o ddeg o gerddi am y planedau a'r haul yn arbennig ar ei gyfer.

Mae bellach yn bosib gwylio'r holl gynhyrchiad ar lein ar wefan S4C neu ar iPlayer y BBC. Os hoffet ti ddarllen cerddi Serenestial (a berfformiwyd yn arbennig ar y noson gan Sara Lloyd-Gregory) wrth wylio'r rhaglen, clicia fan hyn. Darlledwyd y rhaglen am y tro cyntaf neithiwr, a bydd ar gael i'w gwylio tan ddiwrnod olaf Tachwedd.