Mae gwefan newydd wedi ei lansio gan wasg Atebol, sef barddoniaeth.cymru. Adnodd ymarferol yw'r wefan ar gyfer cyflwyno a dadansoddi barddoniaeth yng Nghyfnod Allweddol 3. Mae'r wefan yn cynnwys deugain o gerddi wedi eu dosbarthu yn ôl wyth o themâu, a hynny gan drawstoriad eang o feirdd am bynciau amrywiol iawn. Ceir yn eu plith un gerdd gen i, sef Y Cadno Coch o'r gyfrol Sgrwtsh! (Gomer, 2011).

​Mae'r adnoddau'n cynnwys fideo o'r bardd yn darllen ac yn trafod y gerdd, crynodeb ohoni, tŵlbocs gweithgareddau a thasgau amrywiol. Y nod, wrth gwrs, yw galluogi i bobl ifanc fwynhau barddoniaeth o'r newydd.

Fel y nodir ar y wefan, bwriad yr adnodd yw cefnogi Rhaglen Astudio Llafaredd a Darllen y Fframwaith Llythrennedd a Rhifedd, ac fe'i ariannwyd yn rhannol gan Lywodraeth Cymru. Awdur y wefan yw'r prifardd Ceri Wyn Jones.

Mae chwech o storïau doniol newydd i blant rhwng 7 ac 11 oed (Cyfnod Allweddol 2) wedi eu cyhoeddi gan CAA – Canolfan Adnoddau Addysgol – sef Cyfres Halibalŵ:

• Syniadau Slei gan Mari Løvgreen
• Y Tocyn Raffl gan Anni Llŷn
• Project Poli gan Gwenno Mair Davies
• Tŷ Tomi Treorci gan Dafydd Llywelyn
• Iârgyfwng! gan Gwennan Evans
• Teulu Tŷ Bach gen i

Yng ngeiriau golygydd y gyfres, Fflur Aneira Davies:

'Rydym wrth ein boddau yn cael cyhoeddi’r llyfrau gwreiddiol hyn i blant Cymru. Maen nhw wedi’u hysgrifennu gan awduron ifanc a phoblogaidd sy’n gweithio’n gyson gyda phlant yr oedran hwn, felly maen nhw’n adnabod eu cynulleidfa yn dda. Bydd y nofelau bywiog, yr hiwmor a’r lluniau lliw gan arlunwyr talentog yn siŵr o apelio at ferched a bechgyn ledled Cymru. Mae’r gwerthiant wedi bod yn wych yn y pythefnos cyntaf ers eu cyhoeddi.'

Yn rhyfedd iawn, rydw i, Fflur, Mari a Gwenno i gyd yn raddedigion o Adran y Gymraeg ac Astudiaethau Celtaidd, a hynny'r un flwyddyn! Roedd yn braf iawn cwrdd â'r tair eto yn lansiad y gyfres yn Ysgol Gynradd Llanbryn-mair ddechrau Tachwedd.

Mae fy stori i, Teulu Tŷ Bach, wedi ei ddarlunio'n wych gan Rhys Aneurin ac yn sôn am dri chymeriad rhyfedd sy'n byw yn y tŷ bach hwnnw, sef Blodwen a'i gŵr, Cleif, a'u ci Sam. Mae Blodwen yn hoffi garddio, mae Cleif yn hen bysgotwr tal, tal ac mae Sam y Ci'n treulio'i amser yn trio cael gafael ar y Gath Drws Nesaf …

Mae syniadau a gweithgareddau difyr i gyd-fynd â'r storïau ar wefan Hwb, sy'n addas i oedolion eu defnyddio gyda phlant wrth hybu iaith a llythrennedd mewn ysgolion ac yn y cartref.

Ceir adolygiadau ar wefan Mam Cymru ac ar flog Bethan Gwanas.

Mae cyfrol newydd liwgar a doniol iawn i blant wedi ei chyhoeddi gan wasg Atebol. Addasiad gen i yw Yr Arth Aruthrol o'r gyfrol Saesneg Boogie Bear gan David Walliams, a'r darluniau gan Tony Ross. Y llyfr hwn oedd y gwerthwr gorau ym mis Hydref yng nghategori'r llyfrau Cymraeg i blant. Dyma'r disgrifiad ar wefan Gwales:

Stori lawn hiwmor am arth wen sy'n byw ym Mhegwn y Gogledd ac sy'n hoff o nofio, o bysgota, o fwyta ac o gysgu. Ond un diwrnod, mae hi'n syrthio i gysgu ac yn deffro ym mhell bell o adre. Dydy pethau erioed wedi bod cynddrwg. Ond maen nhw ar fin mynd yn waeth … yn waeth o lawer!

Mae ail gyfrol Casia Wiliam fel Bardd Plant Cymru wedi ei chyhoeddi gan Wasg Carreg Gwalch, sef Pawen Lawen! Cerddi gan Casia a chan Feirdd Plant y gorffennol am fyd natur yw'r cynnwys y tro hwn, a hynny ar sawdl cyfrol y llynedd am fwystfilod o bob math.

​Yng ngeiriau Casia yn ei chyflwyniad i'r gyfrol:

Ers i mi ddechrau ar fy ngwaith fel Bardd Plant Cymru, rydw i wedi holi plant mewn sawl ysgol pa thema fydden nhw'n ei dewis ar gyfer casgliad o gerddi, a dro ar ôl tro mae plant wedi dweud 'Byd Natur', felly rydw i wedi gwrando! Mae'r gyfrol hon yn llawn cerddi gwych am anifeiliaid slei, dail direidus, anturiaethau anhygoel allan yn yr awyr agored, a llawer mwy. Digon i wneud i chi daflu'r llyfr drwy'r ffenest a chychwyn allan am antur eich hun …

Yn eu plith, mae gen i ddwy gerdd, y naill am y ffaith fy mod i'n casáu garddio, a'r llall am oen bach.

Mae dwy gyfrol newydd i blant wedi eu cyhoeddi gan wasg Atebol, addasiadau gen i o straeon gwych a lliwgar gan David Walliams a Louise Greig (am fwy o lyfrau, clicia fan hyn).

Mae'r cyntaf – Neidr yn yr Ysgol! – yn fersiwn Cymraeg o lyfr poblogaidd iawn gan David Walliams a Tony Ross, There's a Snake in my School! (Harper Collins). Dyma ddisgrifiad o wefan Atebol:

Mae Mirain, y prif gymeriad, yn ferch ysgol sy'n hoffi bod yn wahanol. Ar ddiwrnod 'dewch ag anifail anwes i'r ysgol', mae hi'n penderfynnu dod ag anifail gwahanol iawn gyda hi …

Mae'r ail gyfrol – Sgubo – yn fersiwn Cymraeg o lyfr hynod liwgar gan Louise Greig a Júlia Sardà. Dyma ddisgrifiad o wefan Gwales:

Mae hwyliau drwg Daf bob tro'n dechrau'n fach, fach. Ond ymhen dim, maen nhw'n cyflymu nes eu bod nhw'n sgubo drwy'r dre i gyd. Stori yw hon am blentyn sy'n delio ag emosiynau mawr, a stori i godi'r galon.