Mae rhifyn newydd o gylchgrawn llenyddol Taliesin wedi cyrraedd y tŷ, a'i glawr gwyrdd golau'n dod â'r gwanwyn drwy'r drws. Ond mae a wnelo'r rhifyn hwn fwy â diwedd pethau na'u dechrau, yn anffodus, gan mai hwn yw'r rhifyn olaf o Taliesin​ yn ei ffurf bresennol. Mae'r ddwy olygyddes, Angharad Elen a Siân Melangell Dafydd, yn rhoi'r gorau i'r gwaith ar ôl chwe mlynedd, a bu'r cais i adnewyddu'r grant i barhau â'r cylchgrawn yn aflwyddiannus. Fel y dywedir yn y golofn olygyddol:

Er mai siom a chwithdod garw yw gweld y cylchgrawn hwn yn dod i ben ar ôl 55 mlynedd di-dor, hel mwg i sachau fyddai hiraethu a marwnadu. Yr hyn sy'n bwysig yw bod y Cyngor Llyfrau wedi ei gweld hi'n iawn i ddyfarnu grant i gyhoeddiad llenyddol newydd, cyffrous.

Enw'r cyhoeddiad newydd hwnnw yw O'r Pedwar Gwynt, dan olygyddiaeth Sioned Puw Rowlands, Owen Martell a Mari Siôn, gyda chefnogaeth gan Brifysgol Bangor a PEN Cymru. Bydd y rhifyn cyntaf yn ymddangos yn Eisteddfod Genedlaethol Sir Fynwy ym mis Awst eleni.

Roedd bob tro'n wefr gweld fy ngwaith wedi ei gyhoeddi rhwng cloriau Taliesin. Rwy'n falch i ddweud, er mor rhyfedd yw cyfaddef hynny, fy mod i'n rhan o'r rhifyn olaf hwn, lle ceir adolygiad gen i o'r ail becyn yng nghyfres Yr Hen Lyfrau Bach (gol. Dafydd Glyn Jones). Braf medru dweud imi gael blas mawr ar y pedair cyfrol newydd yn y gyfres, lle cyflwynir testunau dethol gan Lloyd George, Omar Kayyâm/John Morris-Jones, Twm o'r Nant a Goronwy Owen.

Roedd bob tro'n braf pori drwy gynnwys y cylchgrawn hefyd, ac nid yw'r rhifyn hwn yn eithriad. Dwi eisoes wedi cael blas ar gyfraniadau amrywiol gan Twm Morys, Robin Llywelyn, Karen Owen a Sian Northey ... mynnwch gopi, a mwynhewch!

The latest issue of Taliesin, the Welsh literary magazine founded in 1961, will be the last, its funding having been recently withdrawn. A new publication will, however, come in its place. The first issue of Y Pedwar Gwynt, supported by Bangor Unversity and Wales PEN, will be launched at the National Eisteddfod in Monmouthshire this August. The current issue of Taliesin contains my review of four new books in the Hen Lyfrau Bach series, namely editions of work by Lloyd George, Omar Kayyâm/John Morris-Jones, Twm o'r Nant and Goronwy Owen.

Mae cyfrol newydd o farddoniaeth i blant yn y siopau - Geiriau Bach Chwareus gan Wasg Carreg Gwalch. Prif awdur y gyfrol, a'r un sy'n gwenu ar y clawr, yw Anni Llŷn, Bardd Plant Cymru 2015-17. Fel mae Anni yn ei ddweud yn ei chyflwyniad i'r gyfrol:

Mae pob un ohonan ni wedi chwarae ryw dro ... Mae beirdd yn chwarae bob dydd. Chwarae efo geiriau, chwarae efo dychymyg, chwarae efo delweddau. Ond plant ydi'r gorau am chwarae ... Dyma gasgliad o gerddi chwareus gan feirdd chwareus i blant chwareus!

Mae'r gyfrol yn cynnwys cerddi gan bob un o gyn-Feirdd Plant Cymru - tri ar ddeg ohonyn nhw i gyd, o Myrddin ap Dafydd i Mererid Hopwood - yn ogystal â cherddi gan Geraint Løvgreen, Mari Løvgreen a phlant Adran yr Urdd, Llithfaen. Yn eu plith mae dwy gerdd gen i, y naill yn sôn am y boen o orfod golchi esgidiau pêl-droed budur a'r llall am y peryglon o ennill gemau bwrdd ...

Os wyt ti'n hoffi chwarae, cofia brynu'r gyfrol, a mwynha'r darllen!

Heddiw mae Cymru'n chwarae Lloegr yn eu gêm olaf ond un ym Mhencampwriaeth y Chwe Gwlad 2016. Dyma achub ar y cyfle i roi cerdd newydd ar y wefan, sef cyfres o englynion a luniais i ar gyfer y tîm rygbi cenedlaethol yn ôl yn 2012, a hynny ar gais rhaglen Dafydd a Caryl ar BBC Radio Cymru. Pob lwc bois!

Y llynedd fe ofynnodd gwasg Atebol imi addasu llyfr lliwgar i blant dan saith oed gan Rachel Bright a Jim Field o'r enw The Lion Inside (Orchard Books). Daeth Y Llew tu Mewn o'r wasg fis Chwefror eleni, a chael ei enwi'r gwerthwr gorau ar gyfer y mis hwnnw yng nghategori llyfrau Cymraeg i blant. Dyma ddisgrifiad gwefan Gwales:

Llyfr stori gynnes gyda thestun sy'n odli ac sydd hefyd â neges arbennig i'w dysgu. Y prif gymeriad yw llygoden fach sy'n ceisio ennill ei phlwyf yng nghanol yr anifeiliaid mawr! Ar ddiwedd y daith mae'n darganfod ei llais ei hun ac yn dysgu bod gan bob anifail, boed fawr neu fach, ran bwysig i'w chwarae yn y byd.

Mae'r testun Cymraeg wedi ei osod ochr yn ochr â'r testun Saesneg, ac felly'n arbennig o ddefnyddiol i blant a rhieni nad ydynt yn rhugl yn yr iaith.

Rai wythnosau'n ôl fe ymunais i â dau o staff Atebol, Heulwen a Lleu, yn nhafarn a bwyty'r Llew Du yn Nhal-y-bont i ffilmio fideo 'Amser Stori'. Mae fideos eraill tebyg i'w gweld ar sianel YouTube Atebol. Dyma'r fi, felly, yn darllen stori Y Llew tu Mewn - mwynhewch!

Clicia fan hyn i weld fideo arall ohonof i'n darllen stori arall i blant dan saith oed, Deg Deinosor Bach.

Clicia fan hyn i weld mwy o lyfrau gen i.