Ar ddydd Mercher 16 Tachwedd, dathlwyd ailagor Siop eiconig y Pethe ar ei newydd wedd gyda llond diwrnod o ddigwyddiadau amrywiol yn Aberystwyth. Yn y bore fe wnes i fwynhau bod yn rhan o sgwrs rhwng awduron Ceredigion yn y siop ei hun, ac amser cinio ro'n i'n un o griw o feirdd a fu'n cystadlu mewn talwrn arbennig ym mwyty Medina, gyda'r prifardd Ceri Wyn Jones yn meuryna.

Un o lwyddiannau mawr y dydd i mi oedd gweld cynifer o ddigwyddiadau llenyddol yn digwydd yng nghanol y dref – digwyddiadau sy'n rhan naturiol o fywyd mewn cynifer o bentrefi gwledig yng Ngheredigion, ond rhai sy'n anaml yn cyrraedd strydoedd sifig y sir. A minnau'n un o drigolion Aber ers rhai blynyddoedd bellach, roedd gweld digwyddiadau cwbl Gymraeg fel hyn yn cael eu cynnal dafliad carreg o fy nghartref yn beth gwych iawn.

Ar ben hynny i gyd, roedd y talwrn yn un o'r pethe gorau imi fod yn rhan ohono ers tro – cynulleidfa hwyliog, bwyd da a cherddi blasus gan Hywel Griffiths, Iestyn Tyne, Sarah Down, Gruffudd Antur, Marged Tudur, Endaf Griffiths a Carwyn Eckley. Dyma gywydd ysgrifennais i ar y testun 'Cywydd i unrhyw wleidydd' – cyfle da i fwrw bol am antics diweddaraf enfant terrible Plaid Cymru …

Llongyfarchiadau i Aled, Dafydd, Heulwen a gweddill criw'r siop, a phob hwyl i'r dyfodol!

Fe fues i'n brysur dros yr haf yn cyfieithu ac yn addasu dwy gyfrol ddoniol iawn ar gyfer gwasg Atebol.

Mae'r gyntaf – Yr Arth a fu'n Bloeddio Bw! – yn fersiwn Cymraeg o lyfr poblogaidd gan David Walliams a Tony Ross, The Bear Who Went Boo! (HarperCollins). Dyma ddisgrifiad gwefan Gwales:

Stori lawn antur yn adrodd hanes arth wen ddrygionus sy'n byw ar ben y byd, mewn gwlad o eira a rhew. Hoff ddiddordeb yr arth ydy gweiddi 'BW!' gan ddychryn pawb o'i hamgylch. Un diwrnod caiff yr arth fraw, gan ddysgu nad yw hi'n beth da i weiddi a dychryn pawb bob amser!

Mae'r ail gyfrol – Cefin y Coala Carcus – yn fersiwn Cymraeg o'r llyfr diweddaraf gan Rachel Bright a Jim Field, The Koala who Could (Orchard Books). Hon yw'r ail gyfrol gan y ddau i mi ei haddasu'n ddiweddar – Y Llew tu Mewn oedd y gwerthwr gorau yng nghategori llyfrau Cymraeg i blant fis Chwefror eleni.

​Dyma ddisgrifiad gwefan Gwales o Cefin y Coala Carcus:

Dewch i gwrdd â Cefin y coala, sy'n hoffi pethau FEL Y MAEN NHW, heb DDIM NEWID. Ond pan mae pethau'n newid yn ddirybudd un dydd, daw Cefin i ddysgu sut i fwynhau profiadau NEWYDD ac ANHYGOEL. Stori ddoniol ar gyfer unrhyw un sy'n teimlo pryder wrth wynebu newid.

Mae stori'r arth fach wen ar gael nawr, a bydd stori Cefin ar gael i'w phrynu ar lein ac yn y siopau ym mis Rhagfyr. Dwy anrheg wych, felly, ar gyfer y Nadolig!

Mae'r testun Cymraeg wedi ei osod ochr yn ochr â'r testun Saesneg yn y ddwy gyfrol, ac felly'n arbennig o ddefnyddiol i blant a rhieni nad ydynt yn rhugl yn yr iaith.

I weld mwy o lyfrau gen i, clicia fan hyn.