A hithau'n Wythnos y Glas yma yn Aberystwyth, a phoblogaeth y dref wedi mwy na dyblu dros nos, a'r strydoedd yn llawn cleber a'r tafarndai'n orlawn eto, dyma ychwanegu cerdd newydd at y wefan – un sy'n sôn am y cyfleoedd gwych mae Aber yn eu cynnig i siarad Cymraeg o fore gwyn tan nos.

Ysgrifennais y cywydd yn 2010, a'i ddarllen yn seremoni raddio UMCA y flwyddyn honno (ac, wedi meddwl, yn y Stomp yn Eisteddfod Genedlaethol Blaenau Gwent a Blaenau'r Cymoedd). Pob hwyl i fyfyrwyr Cymraeg newydd y brifysgol yn yr holl adrannau ac, wrth gwrs, yn holl dafarndai'r dref!

Yn seremoni Llyfr y Flwyddyn ym mis Gorffennaf eleni, enillwyd y Wobr Ffeithiol Greadigol gan yr Athro Gruffydd Aled Williams, am ei gyfrol Dyddiau Olaf Owain Glyndŵr. A hithau bellach yn dridiau wedi Diwrnod Owain Glyndŵr ar 16 Medi, dyma achub ar y cyfle i longyfarch yr Athro ac ychwanegu at y wefan hon gerdd a ysgrifennais i ar ei ymddeoliad yn 2008.

Gruffydd Aled oedd fy nhiwtor wrth astudio canu cynnar Guto'r Glyn am radd MPhil yn Adran y Gymraeg ac Astudiaethau Celtaidd ym Mhrifysgol Aberystwyth. Mae'r egwyddorion gwerthfawr a ddysgais dan ei arweiniad ef – trin ffynonellau'n ofalus, traethu'n eglur ac ymchwilio'n drylwyr – i'w gweld i gyd yn eglur yn Dyddiau Olaf Owain Glyndŵr. Ac ystyried cynifer o gyfrolau ceiniog a dimau a gyhoeddir am Owain a'i debyg o flwyddyn i flwyddyn, dyma gyfrol sy'n pontio'n feistrolgar rhwng gwaith academaidd cyfewin fanwl ar y naill law, ac ar y llall ymdriniaeth boblogaidd â thynged drist un o arwyr mwyaf y genedl. Prynwch hi!

Pan o'n i'n grwtyn ifanc, doedd dim llawer nad o'n i'n ei wybod am ddeinosoriaid – maint, enwau, pryd ro'n nhw'n byw, beth ro'n nhw'n ei fwyta …

Ro'n i wrth fy modd, felly, pan ofynnodd Gwasg Gomer imi addasu Aliens Love Dinopants, y diweddaraf mewn cyfres o lyfrau i blant o dan saith oed gan Claire Freedman a Ben Cort – Pobl y Pants a'r Deinosoriaid. Dyma ddisgrifiad gwefan Gomer:

Mae Pobl y Pants o'r Gofod wedi glanio reit yng nghanol y jwngwl, heb sylweddoli eu bod ar fin darganfod y pentwr mwyaf o bants erioed. Maen nhw ar ben eu digon … nes i berchnogion enfawr y pants anhygoel darfu arnyn nhw!

Dyma'r bedwaredd gyfrol i mi ei haddasu yn y gyfres wych hon, yn cynnwys Antur Fawr Panta Clos a Rhyfel Mawr y Pants. Clicia fan hyn i'w gweld nhw i gyd.

Nid dyma'r unig lyfr i blant imi ei addasu sy'n sôn am ddeinosoriaid direidus – cymer olwg hefyd ar Deg Deinosor Bach (Atebol). I wylio fideo ohonof i'n darllen y llyfr, clicia fan hyn.

Pobl y Pants a'r Deinosoriaid is my recently published adaptation (published by Gwasg Gomer) of Claire Freedman's and Ben Cort's latest addition to their brilliant Aliens Love … series. For more books, click here (including another one about dinosaurs).