Arddangosfa yng nghanolfan Morlan, Aberystwyth

Bydd y sawl sy wedi ymweld â chanolfan Morlan yn Aberystwyth yn gyfarwydd â phwysigrwydd yr adeilad i gymunedau'r dref a'r cyffiniau ac, yn wir, i gymunedau y tu hwnt i Aber. I'r sawl nad yw'n gyfarwydd â Morlan, canolfan ydyw sy'n bont rhwng yr eglwys a'r gymdeithas ac yn fan cyfarfod (gellir llogi ystafelloedd) i bobl o bob cefndir. Fel y dywedir ar wefan Morlan, mae'r adeilad yn lle i

greu a thrafod, i wrando a dysgu, i ysgogi a chalonogi, i gyd-ddeall a chlosio, i rannu a chyfrannu – tir canol rhwng yr eglwys a phawb sy'n byw yn ein cymdeithas amlddiwylliannol.

A hithau bron yn ddeng mlynedd ers sefydlu Morlan ym mis Ebrill 2005, mae cyfres o ddigwyddiadau wedi eu cynnal i ddathlu'r Deg dros Ddeg. Y nawfed digwyddiad yn y gyfres yw arddangosfa o gelf a barddoniaeth yn oriel bar coffi Morlan. Mae pob darlun a cherdd yn ymateb yn ei ffordd ei hun i'r ffaith fod Morlan yn fwy nag adeilad, ac yn cymell ei hymwelwyr i feddwl o'r newydd am Gymru, am ffydd, am gymuned ac am bontio amlddiwylliannol.

Ceir gweithiau celf gwreiddiol gan wyth o artistiaid: Marian Delyth, Anthony Evans, Iestyn Hughes, Ruth Jên, Wynne Melville Jones, Gareth Owen, John Rowlands a Diana Williams.

Ynghyd â Myrddin ap Dafydd, Huw Meirion Edwards, Anwen Pierce ac Annette Williamson, cefais fy ngwahodd i gyfrannu cerdd i'r arddangosfa. Meddyliais am yr hyn mae Morlan yn ei gynrychioli i mi, a sylweddoli'n fuan ei fod yn cynrychioli pob math o wahanol bethau, ac mai dyna, yn y pen draw, ran fawr o lwyddiant y ganolfan. Gellir darllen y cywydd ar y blogbost hwn.

Morlan

Canolfan i gydganu …
hafan gau mewn dyddiau du …
rhyw harbwr hir … aber hen …
ein tŷ Dduw … cyntedd awen …
dau wydryn cyn mynd adref …
pont i'r iaith …
                         pa un yw'n tref?

Hyn i gyd - byd mewn lle bach,
angor mewn dŵr ehangach:
yn Gymraeg mae ar agor,
un murlun mawr ar lan môr.

Mae'r arddangosfa ar agor tan 24 Mawrth, o ddydd Llun i ddydd Gwener, 10.00-12.00 / 14.00-16.00. Mae'r gweithiau celf i gyd ar werth (gellir talu am y gwaith yn fisol).

---

The Morlan centre in Aberystwyth - a unique meeting place for people of all backgrounds - is currently exhibiting specially commissioned works of art and poetry to celebrate its centerary in April. Art by Marian Delyth, Anthony Evans, Iestyn Hughes, Ruth Jên, Wynne Melville Jones, Gareth Owen, John Rowlands and Diana Williams. Poetry by Myrddin ap Dafydd, Huw Meirion Edwards, Anwen Pierce, Annette Williamson and myself. The exhibition is open until 24 March, Monday to Friday, 10.00-12.00 / 14.00-16.00 (all the art is for sale).