Gwobrau Gŵyl Dewi Awards 2018

Yn dilyn llwyddiant Gwobrau Gŵyl Dewi y llynedd, dyma ddychwelyd eleni i'r Hen Goleg i ddathlu'r hyn y mae myfyrwyr ac aelodau o staff Prifysgol Aberystwyth yn ei wneud dros yr iaith Gymraeg. Cynhaliwyd seremoni arbennig brynhawn Gwener 16 Mawrth, a'r machlud ar y môr drwy ffenestri hirion y neuadd fawr yn geflen drawiadol i'r cyfan. Llongyfarchiadau mawr i'r pedwar enillydd – dyma'r pedwar englyn a luniais i'r enillwyr.

---

Steph Davies
Astudio drwy'r Gymraeg
Mae dyfalbarhad Steph wrth ddysgu'r iaith – hi yw'r unig aelod o'i theulu yng Nghaerffili sy'n medru Cymraeg ar hyn o bryd – yn ein hatgoffa mai braint a hawl pob Cymro a Chymraes yw siarad ei iaith ei hun.

Ynot er dydd dy eni – roedd un rhodd,
        Un rhodd nawr a rwygi
    Yn agored pan ddwedi,
    'Y mae hon yn iaith i mi.'

​
Delyn Fritter
Pencampwr y Gymraeg
Wrth ddarllen am yr hyn y bu Delyn yn ei wneud dros yr iaith, roedd un frawddeg yn ei hamlygu ei hun o'r dechrau: 'Mae'r Gymraeg yn fy nghysylltu â hanes, traddodiadau a diwylliant Cymru – mae'r iaith Gymraeg fel un teulu mawr.'

Drwy'r wlad, o Went draw i Lŷn – ry'n ni oll
        Drwy ein hiaith yn perthyn
    I deulu enfawr Delyn,
    Yn ei hiaith mae Cymru'n un.

Lucy Hodson
Dysgwr Disglair
Fe glywais yn ddiweddar rywun yn dweud fod dysgu ieithoedd yn ein galluogi i weld y sbectrwm lliwau'n llawn, yn hytrach na phrofi'r byd mewn un lliw'n unig. Gall Lucy bellach weld Cymru yn ei holl amrywiaeth.

Ar hyd y wlad, tir di-liw – a wêl rhai,
        Ni wêl rhai ond unlliw,
    Ond drwy siarad, daw'r wlad liw
    I rai, wel, yn amryliw.


Branwen Davies
Hyrwyddo'r Gymraeg yn y Gweithle
O blith yr holl bethau y mae Branwen wedi bod yn eu gwneud er mwyn hyrwyddo'r Gymraeg, fe dynnodd un fy llygad yn syth, sef cyflwyno Gair yr Wythnos yn y swyddfa – o bethau bychain, yn wir, y daw llwyddiant mawr yn y man.

Bob wythnos, am iti osod – un gair
        Ar gof, am eu gwarchod,
    I'th fawrhau mae degau'n dod,
    Ac Aber sy'n eu gwybod.

---

Following the success of the Gŵyl Dewi Awards last year, a special ceremony was held at the Old College on 16 March to honour two Aberystwyth University students and two members of staff for making a great contribution to the advancement of the Welsh language. In writing my short poems to each of the winners, I realised again how important seemingly small decisions can be in the work of reminding everyone in Wales – and many beyond – that Welsh is their language.