Llyfr newydd: Llyfr Bach Priodas

A hithau'n dymor priodasau, daeth llyfr newydd amserol o'r wasg ddechrau Awst – Llyfr Bach Priodas (gol. Elinor Wyn Reynolds, Gwasg Gomer). Yn ôl gwefan y wasg, dyma gyfrol sy'n llawn

straeon difyr am gyfarfyddiadau, am syrthio mewn cariad ac am briodi. Cerddi bendigedig a ysgrifennwyd â chariad gan rai o feirdd gorau Cymru – cerddi i chi eu mwynhau a rhai y medrwch eu defnyddio fel rhan o’ch gwasanaeth priodas yn ogystal. Casgliad o luniau priodasau drwy’r degawdau sy’n cydgerdded â’r geiriau yn y gyfrol arbennig hon. Dyma anrheg ddelfrydol i bawb sydd ar fin priodi neu sy’n dathlu pen-blwydd eu priodas.

Yn wreiddiol, ysgrifennais y gerdd sydd gen i yn y casgliad ar gyfer priodas fy chwaer yng nghyfraith, Aranwen, a Dan ym mis Mai eleni. Addasiad yw'r gerdd o eiriau cân enwog Bob Dylan, 'Make You Feel my Love', a ganwyd o'r newydd lawer tro dros y blynyddoedd, yn fwyaf amlwg gan Adele yn 2008. Canwyd y geiriau Cymraeg yn hyfryd ar ddiwrnod y briodas gan Lisa Angharad, ffrind agos i Aranwen ers dyddiau ysgol, a hynny yn eglwys Cydweli, y dref lle cafodd Dan ei fagu. Roedd y fersiwn gwreiddiol o'r pennill olaf ond un yn cyfeirio at afon Gwendraeth Fach ac at y ffaith fod Dan yn blastrwr – y gorau yn Sir Gâr yn ôl rhai! – ond mae fersiwn gwahanol yn y gyfrol.

​Ac ystyried bod mwy a mwy o alw am farddoniaeth i'w darllen mewn priodasau, mae'r gyfrol fach hon yn llenwi bwlch go fawr yn y farchnad. Mae ynddi gerddi newydd gan dros ddeg o feirdd, yn cynnwys Hywel Griffiths, sy'n briod ag Alaw, trefnydd priodasau gyda'i chwmni, Priodasau Calon. Ac mae gan Llyfr Bach Priodas chwaer-gyfrol hefyd, sef Llyfr Nodiadau Priodas, ar gyfer trefniadau priodas neu negeseuon gan westeion.

Os hoffet ti gomisiynu cerdd ar gyfer priodas neu ar gyfer unrhyw achlysur arall, clicia fan hyn.

​Am fwy o lyfrau, clicia fan hyn.

---

A new gift book from Gwasg Gomer for couples planning a wedding – Llyfr Bach Priodas – full of anecdotes, beautiful pictures and a host of poems about weddings and love that can be used on the big day or simply read for enjoyment. It includes a poem I composed for my sister-in-law, Aranwen, on her wedding to Dan in Cydweli earlier this year – a Welsh-language adaptation of Bob Dylan's famous song, 'Make You Feel my Love'. A companion volume, Llyfr Nodiadau Priodas, is also available for jotting down planning notes, or for recording wedding guests' personal messages.

To commission a poem for a wedding or for any other occasion, click here.