Llyfr newydd: Teulu Tŷ Bach

Mae chwech o storïau doniol newydd i blant rhwng 7 ac 11 oed (Cyfnod Allweddol 2) wedi eu cyhoeddi gan CAA – Canolfan Adnoddau Addysgol – sef Cyfres Halibalŵ:

• Syniadau Slei gan Mari Løvgreen
• Y Tocyn Raffl gan Anni Llŷn
• Project Poli gan Gwenno Mair Davies
• Tŷ Tomi Treorci gan Dafydd Llywelyn
• Iârgyfwng! gan Gwennan Evans
• Teulu Tŷ Bach gen i

Yng ngeiriau golygydd y gyfres, Fflur Aneira Davies:

'Rydym wrth ein boddau yn cael cyhoeddi’r llyfrau gwreiddiol hyn i blant Cymru. Maen nhw wedi’u hysgrifennu gan awduron ifanc a phoblogaidd sy’n gweithio’n gyson gyda phlant yr oedran hwn, felly maen nhw’n adnabod eu cynulleidfa yn dda. Bydd y nofelau bywiog, yr hiwmor a’r lluniau lliw gan arlunwyr talentog yn siŵr o apelio at ferched a bechgyn ledled Cymru. Mae’r gwerthiant wedi bod yn wych yn y pythefnos cyntaf ers eu cyhoeddi.'

Yn rhyfedd iawn, rydw i, Fflur, Mari a Gwenno i gyd yn raddedigion o Adran y Gymraeg ac Astudiaethau Celtaidd, a hynny'r un flwyddyn! Roedd yn braf iawn cwrdd â'r tair eto yn lansiad y gyfres yn Ysgol Gynradd Llanbryn-mair ddechrau Tachwedd.

Mae fy stori i, Teulu Tŷ Bach, wedi ei ddarlunio'n wych gan Rhys Aneurin ac yn sôn am dri chymeriad rhyfedd sy'n byw yn y tŷ bach hwnnw, sef Blodwen a'i gŵr, Cleif, a'u ci Sam. Mae Blodwen yn hoffi garddio, mae Cleif yn hen bysgotwr tal, tal ac mae Sam y Ci'n treulio'i amser yn trio cael gafael ar y Gath Drws Nesaf …

Mae syniadau a gweithgareddau difyr i gyd-fynd â'r storïau ar wefan Hwb, sy'n addas i oedolion eu defnyddio gyda phlant wrth hybu iaith a llythrennedd mewn ysgolion ac yn y cartref.

Ceir adolygiadau ar wefan Mam Cymru ac ar flog Bethan Gwanas.

---

Cyfres Halibalŵ is a new series of six funny stories for children aged 7 to 11 (Key Stage 2) from CAA. My story – Teulu Tŷ Bach – is brilliantly illustrated by Rhys Aneurin and is about Blodwen, Cleif and Sam the dog, a trio of weird and wonderful characters who live in a very small house nextdoor to a very mischievous cat and her very grumpy owner. Funnily enough, four of the authors – Fflur, Mari, Gwenno and I – are all 2004 graduates from the Department of Welsh and Celtic Studies at Aberystwyth University. Ideas and activities based on the stories are available on the Hwb website, and can be used to boost language and literacy both in school and at home.