Talwrn Dydd Gŵyl Ddewi

Yn dilyn llwyddiant talwrn arbennig a gynhaliwyd ym mwyty Medina yn Aberystwyth fis Tachwedd, ac a drefnwyd gan Siop y Pethe, cynhaliwyd ail dalwrn yno ddydd Mercher 1 Mawrth. Dathlu Dydd Gŵyl Ddewi oedd yr achlysur, wrth gwrs – ynghyd â lansio siop ar lein Siop y Pethe.

Ceri Wyn Jones oedd y meuryn eto, a'r ddau dîm y tro hwn wedi eu ffurfio o brifeirdd ar y naill law – Hywel Griffiths, Idris Reynolds, Dafydd John Pritchard a Huw Meirion Edwards – ac o Wannabes ar y llaw arall, sef Sarah Down-Roberts, Endaf Griffiths, Arwel Rocet Jones a fi!

Dyma gywydd ysgrifennais i ar y testun 'Cywydd i unrhyw Gymro neu Gymraes enwog'. Fel y gweli, mae'r Cymro a ddewisais i gyda'r enwocaf ohonyn nhw i gyd, ac mae'n grwt lleol! Yn wir, ac ystyried pa mor enwog yw'r boi, mae'n drueni na fuasen ni yma yng Ngheredigion yn gwneud mwy ohono. Beth amdani, drigolion Aber – a yw'n hen bryd cynnal gŵyl i un o feirdd gorau'r genedl?

Gŵyl yn Aber?

Gŵyl i Dahl, gŵyl i Dylan,
A Gŵyl-gael-hwyl Nôl a Mla'n,
Tafwyl a Gŵyl holl Blant Gwent,
Gŵyl Arall a Gŵyl Lorient,
Gardd Goll, Dyn Gwyrdd, y Gelli,
Gŵyl gynta'r Cynhaea' i ni,
A'r Ŵyl Fawr, pob rhyw ŵyl fwyd
(A rhywrai a ohiriwyd),
Gwyliau gwin, gŵyl y geni,
Lôn i brifwyl Môn i mi,
Gŵyl un dydd Owain Glyndŵr,
Gŵyl anhygoel yn Ogwr,
Gŵyl Dewi (gwael ei dywydd),
Llên Plant, Cerdd Dant, pob sant sydd …

Pwy nesa', bobol Aber?
Ym mhorthdy Mawrth, dyma her
I'n cymell, draethell i drum …
Gŵyl i Ddafydd ap Gwilym!

---

Following the success of a talwrn held in Medina by Siop y Pethe back in November, another bardic contest was held to celebrate St David's Day on 1 March, for which I wrote this poem calling on the people of Aberystwyth to add one more to the already burgeoning list of festivals held across Wales every year – and why shouldn't we be celebrating one local boy done good who happens to be one of Wales's greatest poets?!