Talwrn Siop y Pethe, Nadolig 2018

Cynhaliwyd Talwrn Awr Ginio ddydd Gwener 7 Rhagfyr ym mwyty Medina yn Aberystwyth, a hynny fel rhan o ddathliadau pen blwydd Siop y Pethe yn hanner cant. Ceri Wyn Jones oedd y meuryn, ac fe ges i a Hywel Griffiths y dasg o lunio dau dîm, er mai dau berchennog Siop y Pethe, Aled a Dafydd, oedd y capteiniaid yn swyddogol! Llwyddodd Hywel enlistio'r prifeirdd Gwenallt Llwyd Ifan ac Elinor Gwynn, a finnau Geraint Williams a Gruffudd Antur.

Un dasg oedd llunio parodi ar 'Carol Gŵr y Llety' gan W. Rhys Nicholas. Gruffudd Antur fu'n gyfrifol amdani ar ein tîm ni, ac fe ofynnodd imi ei helpu i ganu'r parodi wrth y meic. Mae recordiad ohonon ni'n canu'r pennill cyntaf i'w glywed ar rifyn mis Rhagfyr o bodlediad Clera (32.30).

Roedd englyn i'w lunio ar y pryd hefyd, a hynny ar y testun ysbrydoledig 'sbrowts', a dyma a ddaeth i'r fei:

O, Frwsel, ddinas frasach! A ga' i
        Fil o sgewyll afiach?
    'Se haid o'r rhain na holl strach
    Y Saeson fil blasusach.

Dyma hefyd gywydd digon amserol gen i:

Llythyr at Siôn Corn

Annwyl Siôn

• Lysh
• Wii
• Ynys fach gyfrin
• Grawnwin
• Dau grys o Next
• Tri bocset
• Prynhawn o gwsg gosgeiddig, ysgawn
• Gwell tri beirniad i’r Gadair
• Llyfrau
• Cnau
• Pecyn o wair
• A dim, dim yw dim bob dydd, yr awr hon, fory, drennydd, dim smic am stad Mrs May, dim nawr, na dim am Norway na Rees-Mogg, John McDonnell, Hunt, Morduant na Mundell, na Corbyn, Carwyn na’r cwîn na Gove na’r trychfil Gavin na Johnson

Cofion cynnes y Nadolig

Eurig S.

---

A roudy talwrn was held in Medina in Aberystwyth on 7 December to celebrate Siop y Pethe's fiftieth birthday celebrations, for which I wrote this poem to ask Father Christmas for some home comforts and, above all else, to hear no more about the dreadful Tories and their even more dreadful Brexit.