O dro i dro bydd cais yn dod i gyfansoddi geiriau i gân. Mae'r gerdd ddiweddaraf sy ar y wefan hon yn gân a gyfansoddais i ryw flwyddyn yn ôl, ym mis Ebrill 2015, ar gyfer cyngerdd i ddathlu deng mlynedd ers sefydlu Côr Ger y Lli. Gofynnwyd i Robat Arwyn gyfansoddi cerddoriaeth i gyd-fynd â'r geiriau, a chomisiynwyd Lizzie Spikes, artist o Aberystwyth, i baentio darlun yn cynnwys geiriau'r gytgan (gelllir prynu'r darlun ar ffurf print ar wefan Lizzie). Clicia fan hyn i ddarllen y gerdd ac i wybod mwy am hanes ei chyfansoddi.

Mae cyfrol newydd o farddoniaeth i blant yn y siopau - Geiriau Bach Chwareus gan Wasg Carreg Gwalch. Prif awdur y gyfrol, a'r un sy'n gwenu ar y clawr, yw Anni Llŷn, Bardd Plant Cymru 2015-17. Fel mae Anni yn ei ddweud yn ei chyflwyniad i'r gyfrol:

Mae pob un ohonan ni wedi chwarae ryw dro ... Mae beirdd yn chwarae bob dydd. Chwarae efo geiriau, chwarae efo dychymyg, chwarae efo delweddau. Ond plant ydi'r gorau am chwarae ... Dyma gasgliad o gerddi chwareus gan feirdd chwareus i blant chwareus!

Mae'r gyfrol yn cynnwys cerddi gan bob un o gyn-Feirdd Plant Cymru - tri ar ddeg ohonyn nhw i gyd, o Myrddin ap Dafydd i Mererid Hopwood - yn ogystal â cherddi gan Geraint Løvgreen, Mari Løvgreen a phlant Adran yr Urdd, Llithfaen. Yn eu plith mae dwy gerdd gen i, y naill yn sôn am y boen o orfod golchi esgidiau pêl-droed budur a'r llall am y peryglon o ennill gemau bwrdd ...

Os wyt ti'n hoffi chwarae, cofia brynu'r gyfrol, a mwynha'r darllen!

Y llynedd fe ofynnodd gwasg Atebol imi addasu llyfr lliwgar i blant dan saith oed gan Rachel Bright a Jim Field o'r enw The Lion Inside (Orchard Books). Daeth Y Llew tu Mewn o'r wasg fis Chwefror eleni, a chael ei enwi'r gwerthwr gorau ar gyfer y mis hwnnw yng nghategori llyfrau Cymraeg i blant. Dyma ddisgrifiad gwefan Gwales:

Llyfr stori gynnes gyda thestun sy'n odli ac sydd hefyd â neges arbennig i'w dysgu. Y prif gymeriad yw llygoden fach sy'n ceisio ennill ei phlwyf yng nghanol yr anifeiliaid mawr! Ar ddiwedd y daith mae'n darganfod ei llais ei hun ac yn dysgu bod gan bob anifail, boed fawr neu fach, ran bwysig i'w chwarae yn y byd.

Mae'r testun Cymraeg wedi ei osod ochr yn ochr â'r testun Saesneg, ac felly'n arbennig o ddefnyddiol i blant a rhieni nad ydynt yn rhugl yn yr iaith.

Rai wythnosau'n ôl fe ymunais i â dau o staff Atebol, Heulwen a Lleu, yn nhafarn a bwyty'r Llew Du yn Nhal-y-bont i ffilmio fideo 'Amser Stori'. Mae fideos eraill tebyg i'w gweld ar sianel YouTube Atebol. Dyma'r fi, felly, yn darllen stori Y Llew tu Mewn - mwynhewch!

Clicia fan hyn i weld fideo arall ohonof i'n darllen stori arall i blant dan saith oed, Deg Deinosor Bach.

Clicia fan hyn i weld mwy o lyfrau gen i.

Ddechrau'r mis fe dderbyniais i gopi o lyfr lliwgar i blant dan saith oed roeddwn i wedi ei addasu ar gyfer gwasg Atebol - Deg Deinosor Bach. Rai wythnosau'n ôl fe ymunais i â dau o staff Atebol, Heulwen a Lleu, yn nhafarn a bwyty'r Llew Du yn Nhal-y-bont i ffilmio fideo 'Amser Stori'. Mae fideos eraill tebyg i'w gweld ar sianel YouTube Atebol. Mae fideo Y Llew Tu Mewn ar y ffordd hefyd ond, am y tro, dyma fi'n darllen stori Deg Deinosor Bach - mwynhewch!

Daeth llyfr newydd sbon a lliwgar iawn i'r tŷ ddoe, sef addasiad gen i o Ten Little Dinosaurs, cyfrol i blant dan saith oed gan Mike Brownlow a Simon Rickerty - Deg Deinosor Bach. Dyma ddisgrifiad gwefan Gwales:

Mae deg deinosor bach yn cychwyn ar antur. Tybed sut hwyl maen nhw'n ei gael wrth gwrdd â'r triceratops grwgnachlyd, y diplodocws trwstfawr a'r T-rex llwglyd? Stori swnllyd gyda thestun sy'n odli a llu o bethau i'r plant chwilio amdanynt!

Fe ges i lawer o hwyl yn addasu'r gyfrol hon, yn bennaf am fy mod i wrth fy modd â deinosoriaid. Mae'r testun Cymraeg wedi ei osod ochr yn ochr â'r testun Saesneg, ac felly'n arbennig o ddefnyddiol i blant a rhieni nad ydynt yn rhugl yn yr iaith.

​Ynghyd â chyfrol Y Llew Tu Mewn, hon yw'r ail gyfrol farddonol i blant i mi ei haddasu ar gyfer gwasg Atebol.

​Clicia fan hyn i weld mwy o lyfrau gen i.